13. Tourdion

Capriol.

Donnez moy en premier lieu l'air d'un tourdion, puis vous me donnerez l'air de la gaillarde.

Arbeau.

L'air du tourdion & l'air d'une gaillarde sont de mesmes, & ny a difference sinon que le tourdion se dance bas & par terre d'une mesure legiere & concitee: Et la gaillarde se dance hault d'une mesure plus lente & pesante: Tandiz vous faictes bien de demander l'air d'un tourdion: Car quand les airs sont cogneuz par le danceur, & qu'il les chante en son cœur avec le joueur d'instrument, il ne peult faillir à les bien dancer: Vous prendrez donc l'air qui s'ensuyt pour tous les aultres tourdions, dont il en y a des diversitez innumerables.

Capriol.

Je comprends bien cest air: Mais je ny apperçois point les cadances dont m'avez parlé.

Arbeau.

Je vous ay distingué par bastons & lignes perpendiculaires les limites des cadances, lesquelles vous pouvez de vous mesmes reduire ainsi.

Capriol.

je le comprends bien mieulx que je ne faisois, ne me reste qu'à sçavoir quels mouvements je mettray en œuvre.

Arbeau.

Faictes pied en l'air gaulche durant la premiere minime blanche, pour le premier pas.
Puis pied en l'air droict sur la seconde minime blanche, pour le deuxiesme pas.
Puis pied en l'air gaulche sur la troisiesme minime blanche pour le troisiesme pas.
Puis pied en l'air droict sur la quatriesme minime blanche pour le quatriesme pas.
Sur le souspir qui tient place d'une minime blanche, faictes un sault moyen, consideré que cest un tourdion que vous dancez.
Sur la derniere minime blanche, faictes une posture gaulche pour le cinquiesme pas.

Continuant vostre tourdion, changez & faictes à droict ce que vous aurez fait a gaulche, & a gaulche ce que vous aurez fait a droict, sçavoir:

Pied en l'air droict sur la premiere minime blanche pour le premier pas
Puis pied en l'air gaulche sur la seconde minime blanche pour le second pas.
Puis pied en l'air droict sur la troisiesme minime blanche pour le troisieme pas.
Puis pied en l'air gauche sur la quatrieme minime blanche pour le quatrieme pas.
Sur le souspir qui tient place d'une minime blanche, faictes le sault majeur, qui precede la posture: Mais vous ferez ledit sault mediocre, attendu que dancez le tourdion & non la gaillarde.
Sur la derniere minime blanche, faictes une posture droicte pour le cinquieme pas.
Et ainsi continuez tant que le joueur d'instrument continuera de jouer, de permuter & tumber reciproquement en cadance, à l'une des fois en posture gaulche, & l'aultre fois en posture droicte: Et affin que le tout vous soit plus facile à concevoir, je vous feray icy une tabulature de ce que je vous viens de dire, qui vous representera le tout en un clin d'œil. Car je vous mettray encor par escript l'air de ce tourdion, & audroict de chaque notte, je vous donneray par escript lesdits pas & mouvements: Et me delibere d'en faire de mesme l'air d'une gaillarde: Ladicte tabulature vous servira pour toutes les aultres gaillardes, qui sont aussi innumerables.

Capriol.

Aprez que le joueur d'instrument à finy le tourdion. fault-il pas faire une reverence salutatoire pour prendre congé de la Damoiselle.

Arbeau.

Ouy, & la fault doulcement restituer en la place ou lavez prinse, en la remerciant de l'honneur qu'elle vous a faict.

Tabulature pour dancer le tourdion incontinent aprez le retour de la basse-dance.

Air du tourdion reduict en minimes blanches, qui font la mesure du temps.	Mouvements que le danceur doibt faire en dançant le tourdion, lequel se dance incontient apres la basse-dance.

	Pied en l'air gaulche.
	Pied en l'air droict.
	Pied en l'air gaulche.
	Pied en l'air droict.
	Sault moyen.
	Posture gaulche.
	Le revers des precedents.
	Pied en l'air droict.
	Pied en l'air gaulche.
	Pied en l'air droict.
	Pied en l'air gaulche.
	Sault moyen.
	Posture droicte.
	Comme au commencement.
	Pied en l'air gaulche.
	Pied en l'air droict.
	Pied en l'air gaulche.
	Pied en l'air droict.
	Sault moyen.
	Posture gaulce.


	Pied en l'air droict.
	Pied en l'air gaulche.
	Pied en l'air droict.
	Pied en l'air gaulche.
	Sault moyen.
	Posture droicte.

Les mouvements de marque-pied & de marque talon se font assez doulcement, & les pourriez mettre en usage en lieu des pieds en l'air ainsi.

Air du tourdion.	Mouvements pour les cinq pas du tourdion.

	Marque-pied gaulche.
	Marque talon gaulche.
	Marque-pied droict.
	Marque talon droict.
	Sault moyen.
	Posture gaulche.
	Marque-pied droict.
	Marque-talon droict.
	Marque-pied gaulche.
	Marque-talon gaulche.
	Sault moyen.
	Posture droicte.

Capriol.

Je treuve fascheuse ses reductions en cadances: Seroit-ce pas tout un de partir le tourdion par bastons, lesquels enfermeroient deux mesures ternaires, & faire sur la derniere mesure un pas, un sault majeur, & une posture:

Arbeau.

Tout reviendroit à un: Et ne vous avois proposé ladicte reduction sinon pour vous enseigner plus clairement voz cinq pas: Je n'useray donc plus de reduction: Et laisseray en la tabulature l'air de la gaillarde en sa forme, sans y riens reduyre: Seullement souvenez vous d'employer les pas selon les mesures du temps que l'air monstrera en leur marge: Et jugez que sera cadance semblable des mesures escriptes & nottees cy dessoubz, desquelles la troisiesme est reduicte.

Capriol.

La deuxieme mesure du ternaire que vous appellez cadance, ne peult elle estre d'aultre musique, que de l'une de-ces trois qu'avez icy nottees.

Arbeau.

Elle peult estre de plusieurs aultres sortes, telles qu'il plait au compositeur, & que l'air de la gaillarde le requiert: Et fault necessairement que ladicte deuxieme mesure face cadance, ou qu'elle passe sans cadance jusques à la quatrieme mesure, que nous avons dit estre passage d'unze pas, ou jusques à la sixieme mesure, que nous avons dit estre passage de dixsept pas.

L'Orchesographie de Thoinot Arbeau appartient au domaine public et peut être utilisée sans restrictions.