23. Morisques, Canaries et Pavane d'Espagne

MORISQUES

De mon jeusne aage, jay veu qu'és bonnes compagnies, aprez le soupper entroit en la salle, un garçonnet machuré & noircy, le front bandé d'un taffetats blanc ou jaulne, lequel avec des jambieres de sonnettes dançoit la dance des Morisques, & marchant du long de la salle, faisoit une sorte de passage, puis retrogradant, revenoit au lieu ou il avoit commencé, & faisoit un aultre passage nouveau, & ainsi continuant, faisoit divers passages bien aggreables aux assistans: Macrobe en son troisieme livre des Saturnales chap. 14. fait reciter par Horus, que les nobles enfans & jeusnes filles de bonnes maisons de Rome, dançoient avec Crotales, que Bade commentateur interprete sonnettes, mais ceste interpretation ne me plaist, & croirois plustost que Crotales fussent un petit tabourin de basque, garny de clochettes & sonnettes, tel que l'on faisoit porter a la mere des Dieux, ou bien que ce fussent ce que nous appellons cymbales & fer triangulaire, garny de boucles, dont aulcuns jouent & font un bruict aggreable pour accompagner la vielle: Quoy qu'il en soit, ils tenoient a grand louange d'y sçavoir bien dancer.

Capriol.

Ce vers de Virgile sert pour vostre opinion.

Crispum sub Crotalo docta mouere latus.[m]

Si le Poëte eust entendu des sonnettes, il eust mis Cum, & non pas sub : Tandis je vous prie m'en donner quelque peu de tabulature, & je les apprendray adancer a mon laquais.

Arbeau.

Les Morisques se dancent par mesure binaire: Du commencement on y alloit par tappements de pieds, & par ce que les danceurs les treuvoient trop penibles, il y ont mis des tappements des talons seullement, en tenant les arteils des pieds fermes: Aulcuns les ont voulu dancer avec des marque-pieds, & marque-talons meslez ensemble: Lexercice de toutes les trois sortes, signamment celle qui va par tappements de pieds, a fait cognoistre par experience, que finablement on y engendre la podagre & maladies des gouttes, parquoy ceste dance est tumbee en dessuetude: Je ne laisseray de vous en donner l'air, avec les mouvements d'un passage, & quand aux aultres passages, vous les pourrez apprendre de ceulx qui y sont stilez, desquels pour le jourd'huy s'en treuve bien petit nombre.

Tabulature des Morisques.

Air de Morisques.	Mouvements.

	frappe talon droit.	Le danceur de Morisques tient le bout des arteils tousjours ferme cependant qu'il frappe des talons, pour faire resonner ses sonnettes, & les frappe talons sans dire a droit ny a gaulche, equipolent a pieds joincts.
	frappe talon gaulche.
	frappe talon droit.
	frappe talon gaulche.
	frappe talons.
	souspir.
	frappe talon droit.
	frappe talon gaulche.
	frappe talon droit.
	frappe talon gaulche.
	frappe talons.
	souspir.

	frappe talon droit.
	frappe talon gaulche.
	frappe talon droit.
	frappe talon gaulche.
Continuation de l'air de Morisques, comme aussi des mouvements.

	frappe talon droit.
	frappe talon gaulche.
	frappe talon droit.
	frappe talon gaulche.
	frappe talon droit.
	frappe talon gaulche.
	frappe talon droit.
	frappe talon gaulche.
	frappe talons.
	souspir.

Capriol.

Ainsi que me deduisez les mouvements de ceste Morisque, il semble que le danceur ne bougera d'une place.

Arbeau.

Il fault bien qu'il marche tousjours avant, jusques au bout de la salle: Et pour ce faire, notterez qu'aprez le frappe talons qui equipole a pieds joincts & cadance, avant le frappe-talon droit, le danceur avance legerement ses deux pieds, & en mesme instant, fait ledit frappe talon droit: Car si vous considerez bien, aprez les pieds joincts, le frappe talon droit suyt. Notterez aussi, que cest air de Morisques se decouppe par crochues, & a chacune d'icelles, fault des frappe talons comme dessus.

Capriol.

Monsieur Arbeau, je me suis prins garde qu'en toutes les dances desquelles avez deonné les mouvements, vous n'avez point parlé du Ru de vache, & neantmoins vous me l'avez figuré par cy devant entre les aultres mouvements.

Arbeau.

Vous dictes vray: Mais la raison est, parce que les danceurs n'en usent quasi point, si ce n'est en la dance des Canaries, de laquelle je voulois entrer en propos.

CANARIES

Aulcuns dient qu'és Isles des Canaries on use de ceste dance, & qu'elle leur est ordinaire: Aultres, de l'opinion desquels jaymerois mieux estre, soustiennent qu'elle a pris source d'un ballet composé pour une mascarade, ou les danceurs estoient habillez en Roys & Roynes de Mauritanie, ou bien en forme de Sauvages, avec plumaches teintes de diverses couleurs. La façon de dancer les Canaries est telle: Un jeune homme prend une Damoiselle, & danceans ensemble soubz les cadances de l'air qui y est propre, la mene sister au bout de la salle: Ce fait il se recule ou il a commencé, regardant tousjours sa Damoiselle, puis il va la retreuver, en faisant certains passages, quoy fait, il recule comme dessus: Lors la Damoiselle en vient faire aultant devant luy, & aprez se recule en la place ou elle estoit, & continuent tous deux ces allees & reculements, tant que la diversité des passages leur en administre les moyens, notterez que lesdits passages sont gaillards, & neantmoins estranges, bizares, & qui resentent fort le sauvage: Vous les apprendrez de ceulx qui les sçavent, & en pourrez inventer vous mesmes de nouveaulx, seulement je vous donneray l'air de ceste dance, & aulcuns mouvements des passages qu'ont accoustumé de faire les danceurs, a veoir lesquels les spectateurs preignent plaisir.

Tabulature de la dance des Canaries.

Air des Canaries.	Mouvements.

	tappement du pied gaul. causant pied en l'air d.
	marque-talon droit.
	marque-pied droit.
	tappement du pied droit, causant pied en l'air gaulche.
	marque talon gaulche.
	marque-pied gaulche.
	tappement du pied gaulche, causant pied en l'air droit.
	marque-talon droit.
	marque pied droit.
	tappement du pied droit, causant pied en l'air gaulche.
	marque talon gaulche.
	marque-pied gaulche.

	Le reste de c'est air est continué à dancer comme dessus, tant & si long temps que le danceur mect à aller jusques devant sa damoiselle & a retrograder, en demarchant jusques en sa premiere place. Et noterez que pour un second passage, en lieu des tappements de pied que lon a faict sur les minimes blanches de cest air, on peult faire une greve fort haulte, rabaissee en tappement de pied trainé en derrier, comme si on marchoit dessus un crachat, ou qu'on voulust tuer une araignee.

Capriol.

Vous m'avez cy devant promis la pavane d'Espagne aprez les Canaries: Comment la fault-il dancer?

PAVANE D'ESPAGNE.

La pavane d'Espagne se dance par mesure binaire mediocre, soubz l'air, & avec les mouvements, dont s'ensuyt la tabulature, & quand on l'a dancee en marchant en avant pour le premier passage, il la fault retrograder en desmarchant, puis continuant le mesme air, on fait avec aultres nouveaulx mouvements le second passage, puis les aultres consequemment, lesquels pourrez apprendre tout a loisir

Air et mouvements de la pavane d'Espagne.


	pied gaulche avancé.	Ces deux pas font simple a gaulche.
	pieds joincts.	Ces deux pas font simple a gaulche.
	pied droit avancé.	Ces deux pas font simple a droit.
	pieds joincts.	Ces deux pas font simple a droit.
	pied gaulche avancé.
	Pied droict approché, causant pied en l'air gaul.
	fleuret.	Es aultres passages de ceste pavane d'Espagne, en lieu de ces fleurets icy, le danceur fait d'aultres gesticulations, tant en marchant que retrogradant.
	fleuret.
	fleuret.
	fleuret.
	fleuret.
	En la page suyvante pourrez veoir le reste.
Continuation de l'air.	Continuation des mouvements.

	fleuret.
	fleuret.
	pieds joincts.	Le danceur fait ceste fin en tous les passages de la pavane d'Espagne.
	pied en l'air droit.
	pied en l'air gaulche.
	pied en l'air droit.
	pieds joincts.

L'Orchesographie de Thoinot Arbeau appartient au domaine public et peut être utilisée sans restrictions.