24. Les Bouffons

Il me semble (Capriol mon bon amy) vous avoir satisfaict, en vous donnant ce que j'ay peu me resouvenir, tant de la saltation & dance guerriere, que de la recreative: N'est ce pas suffisamment, attendu qu'il y a si long temps que je n'en n'ay fait exercice, & que la pluspart des dances sont nouvelles.

Capriol.

Je ne pense pas (monsieur Arbeau) qu'il soit possible d'en traicter d'avantage ny plus lucidement: Vray est qu'avez encore oublié a parler des Bouffons.

Arbeau.

Vrayement puisque vous m'en advisez, je vous diray ce que j'en ay peu apprendre.

LES BOUFFONS

Les Saliens ou danceurs instituez par le Roy Numa en nombre de douze, pour celebrer les festes sacrees a Mars, estans vestus de robes peintes, avec riches bauldriers & bonnets aguz, les braquemards aux coustéz, les petites baguettes en la main droicte, & en la main gaulche les boucliers (desquels l'un estoit comme on disoit descendu du Ciel) dançoient au son des tibies, & faisoient gesticulations militaires, tantost les uns aprez les aultres, tantost ensembleement.

Capriol.

Ceste dance, n'estoit ce pas la dance armee appellee Pirrique, que Minerve dança de joye aprez les Titanes vaincuz?

Arbeau.

La fable dit que les Curetes inventerent ceste Pirrique pour amuser le petit enfant Juppiter, a leurs gesticulations, & au bruit qu'ils faisoient de leurs espees heurtees contre les boucliers: De ces deux sortes de dances, on en a composé une que nous appellons les Bouffons ou Mattachins, qui sont vestus de petits corcelets, avec fimbries és espaules, & soubs la ceinture, une pente de taffetats soubz icelles, le morion de papier doré, les bras nuds, les sonnettes aux jambes, l'espee au poing droit, le bouclier au poing gaulche: Lesquels dancent soubz un air a ce propre, & par mesure binaire, avec battements de leurs espees & boucliers: Pour comprendre ceste dance, fault presupposer qu'on y fait plusieurs sortes de gestes: L'un des gestes est appellé feincte, quand le danceur saulte sur ses pieds joincts, tenant son espee sans en toucher aucunement: Laultre geste est appellé estocade, quand le danceur recule son bras, & avance la poincte de son espee, pour frapper d'icelle son compagnon. L'aultre geste est appelle taille haulte, quand le danceur frappe son compagnon en descendant & fauchant de la main droicte (de laquelle il tient son espee) a la main senestre: Laultre geste est appellé revers hault, quand au contraire le danceur frappe son compagnon, en fauchant & descendant dés sa main senestre a sa main droicte: L'aultre geste est appellé taille basse, quand le danceur frappe son compagnon, en montant de la main droicte a la senestre: L'aultre geste est nommé revers bas, quand le danceur frappe son compagnon, en montant de la main senestre a la droicte: Et a fin que vous entendiez mieux la tabulature que je vous en veulx donner, je n'espargneray pas de vous figurer lesdictes sortes de gestes.

Feincte.

Estocade.

Taille haulte.

Revers hault.

Vous voyez cy dessus quatre figures des gestes dont je vous ay parlé, sçavoir la feincte, l'estocade, taille haulte, & revers hault, restent les figures des deux aultres gestes, que vous voyez icy dessoubz, oultre lesquels il y a encore quelques mouvements de corps qu'il me semble suffiront de vous estre donnez par escrit, sans qu'il soit besoin de figures.

Taille basse.

Revers bas.

Capriol.

L'escrime m'avoit desja appris tous ces gestes: Dictes moy maintenant comment on dance les Bouffons.

Arbeau.

Presupposez que quatre personnes, soient Soldats ou Amazones, ou deux d'un & deulx d'aultre, sont a l'entree de la salle, A. B. C. D. bien proprement habillez.

Capriol.

Je les ymagine comme vous dictes, que feront-ils?

Arbeau.

Premierement A. entrera seul, & en maniant son espee a mesures, fera une ronde par la salle, & se viendra presenter a l'entree, mettant la poincte de son espee contre le plancher, comme s'il vouloit appeller au combat ses compagnons: Ce fait il recommencera une ronde, & B. le suyvra, a la fin de la ronde, appellera ses compagnons: Lors A. B. recommenceront une ronde, & C. les suyvra, lequel fera comme les deux aultres auront faict: Puis tous trois feront une ronde, & D. qui est le quatrieme les suyvra: Et quand ceste quatrieme ronde sera finie, & qu'il ny aura plus personne a entrer, ils feront une ronde tout au contraire de la premiere, & a la cadance de ceste ronde renversee, ils se treuveront plantez en escadron pour commencer les passages de leurs batteries, & se treuveront ainsi, car ils ont premierement fait leur ronde, le pied gaulche en dehors.

D.	C.
A.	B.

L'air des Bouffons est notoire a un chacun: Le voicy notté entierement jusques a sa cadance, & les joueurs le repetent tousjours, tant en faisant les rondes que les passages.

Air des Bouffons.

Capriol.

Quels mouvements feront ces quatre ainsi campez?

Arbeau.

Il vous fault encore sçavoir, que tout ainsi que les joueurs d'instruments continuent de sonner jusques a la fin l'air cy dessus, aussi les quatre danceurs continuent de dancer les mesmes mouvements, soit en cheminant quand ils font les rondes, soit en s'arrestant quand ils font leurs batteries.

Capriol.

Les mouvements sont-ils fascheux a faire?

Arbeau.

Vous les treuverez tres faciles, comme il appert en la tabulature cy dessoubz, qui se dance par mesure binaire legiere.

Air des Bouffons.	Mouvements pour les dancer.

	greve gaulche.	Tant que la dance dure, jusques a ce que tout soit fait & finy, il ny a point d'aultres mouvements, que les greves qui emportent chacune deux minimes noires. & deux pieds en l'air qui emportent chacun une minime noire.
	pied en l'air droit.
	pied en l'air gaulche.
	greve droicte.
	pied en l'air gaulche.
	pied en l'air droit.

	greve gaulche
	pied en l'air droit.
	pied en l'air gaulche.
	greve droicte.
	pied en l'air gaulche.
	pied en l'air droit.

Vous avez les pas & mouvements des Bouffons, apprenez maintenant les gestes que l'on y fait és passages des batteries, lesquelles il fauldra faire immediatement aprez les rondes, & vous souviendrez qu'à la fin d'un passage, il fault faire une ronde le pied gaulche en dehors, puis la renverser & retrograder ledit pied gaulche en dedans, avant que commencer le passage qui doit suyvre, chose qui sert beaucoup aux quatre danceurs, car pendant qu'ils font la ronde, & qu'ils l'a retornent, ils meditent au passage qu'ils ont a faire, & se remettent en cervelle. Ainsi que les danceurs A. B. C. D. sont disposez, A. est viz a viz de D. & battra contre ledit D. & par fois contre B. qui est a sa droicte. Et au semblable C. se treuvera viz a viz de B. & battra contre ledit B. & par fois contre D. Et notterez que les mesmes gestes que fait A. ces mesmes doit faire C. & par ainsi la tabulature propre au danceur A. servira pour le danceur C. comme voiez icy dessoubz.

A. combat contre D.	C. combat contre B.
& contre B.	& contre D.

Air.	Gestes du premier passage.

	feincte	A faict feincte avec D.
	taille haulte.	A. donne contre D.

	revers hault.	A. donne encore contre D. puis il faict trois quarts de tour de son cousté gaulche, & donne ceste taille basse contre B.
	taille basse.	A. fait un tour a sa main droicte, en dehors, & donne encore audit B. ce revers bas.

	revers bas.
	La page suyvante vous enseignera le reste des gestes de ce premier passage.
Air.	Gestes.

	taille haulte.	A. donne encore contre B. ceste taille haulte, puis torne trois quarts de tour a sa main droicte en dehors, & donne contre D. ce revers bas.

	revers bas.
	taille haulte.	A. donne encore contre D. une taille haulte, & changera de place avec D.

Aprez que A. & D. ont changé de place, & que C. & B. ont aussi changé de place en mesme instant, les quatre danceurs se treuveront ainsi disposez.

A.	B.
D.	C.

A. battra maintenant contre B. & par fois contre D. & C. battra contre D. & par fois contre B. & feront les mesmes gestes & batteries que cy dessus, & quand ils auront changé de place, ils se treuveront campez ainsi:

B.	A.
C.	D.

A. fera les gestes que nous avons dit au commencement, contre D. & par fois contre B. comme aussi fera C. contre B. & quand ils auront changé de place, ils se treuveront ainsi posez.

C.	D.
B.	A.

A. battra contre B. & par fois contre D., comme aussi C. contre D. & par fois contre B. & quand ils auront changé de place, les danceurs se treuveront ainsi posez.

D.	C.
A.	B.

Vous voyez que les quatre danceurs sont posez comme ils estoient au commencement, parquoy leur premier passage est accomply, & doibvent sans intermission, faire leur ronde & retour d'icelle pour commencer le second passage, que l'on appelle passage des trois coups.

Capriol.

Je ferois bien les gestes de A. & de C. mais vous ne m'avez point dit quelz gestes doibvent tenir D. & B.

Arbeau.

Les mesmes que A. & C. & ny a difference, sinon que quand A. & C. font trois quarts de tour en dehors a la gaulche, D. & B. doibvent faire seullement un quart de tour a la droicte, [18] & quand A. & C. font un tour en dehors a la gaulche, D. & B. doibvent faire ledit tour a la droicte: Les aultres passages vous les apprendrez tout a loisir.

Capriol.

Je ne treuveray guieres de maistres ny de compagnons qui m'enseignent les aultres passages, comme ils pourront faire les aultres branles, parquoy je vous prie les m'apprendre, car j'espere quelque jour en faire une jolie mascarade, pour donner plaisir a ma maistresse.

Arbeau.

Je le veulx bien: Supposez donc que les quatre danceurs sont disposez (aprez leur ronde) comme au commencement, ils feront le passage suyvant, que l'on appelle les trois coups.

Passage des trois coups.

A. battra contre D. & C. battra contre B.

Air.	Gestes du second passage.

	taille haulte.	A. donne ces trois coups contre D. puis passent a leurs mains droictes & changent de place l'un l'aultre, C. fait de mesme contre B.
	revers bas.
	taille haulte.

	taille haulte.	A. donne ces trois coups contre B. puis passent & changent de place l'un l'aultre, C. & D. font de mesme.
	revers bas.
	taille haulte.

	taille haulte.	A. donne ces trois coups contre D. puis passent & changent de place l'un l'aultre, C. fait de mesme contre B.
	revers bas.
	taille haulte.

	taille haulte.	A. donne ces trois coups contre B. puis passent & changent de place l'un l'aultre, C. & D. font de mesme, & ainsi les quatre danceurs se retreuvent disposez comme au commencement.
	revers bas.
	taille haulte.
	Ce que dessus se repete quatre fois, & font la ronde.

Passage des quinze coups.

Air.	Gestes du troisieme passage.

	taille haulte.	A. le visage torné en dedans, donne contre D. qui a le visage torné en dehors.
	revers bas.	A. donne contre B. qui a le visage torné en dehors
	taille haulte.	A. encore contre D.
	revers bas.	A. encore contre B.

	taille haulte.	A. torne visage en dehors, & donne contre B qui se torne en dedans.
	revers bas.	A donne contre D. torné dedans.
	taille haulte.	a. donne encore contre B.
	revers bas.	a. donne encore contre D.

	taille haulte.	a le visage torné en dedans, donne contre D. qui a le visage torné en dehors.
	revers bas.	a. donne contre B. qui a le visage torné en dehors.
	taille haulte.	a encore contre D.
	revers bas.	a encore contre B.

	taille haulte.	a. torne visage en dehors, & donne contre B. qui se torne en dedans.
	revers bas.	a. donne contre D. torné dedans.
	taille haulte.	a donne contre B. passent & changent de place a leurs mains droictes.
	Ce fait, a. le visage en dehors battra contre D. qui tornera le visage en dedans, & repeteront pour faire quatre cadances.

Passage de l'estocade.

Air.	Gestes du quatrieme passage.
	Supposé qu'aprez la ronde faicte, les quatre danceurs se treuvent rangez comme au commencement.
	taille haulte.	a. donne contre D. & C. donne contre B.
	revers hault.	a donne encore contre D. & C contre B.

	taille basse.	a donne encore contre D. & C. contre B.
	coude retiré.	tous les quatre a. B. C. D. retirent leur coudes en derrier, & s'entredonnent estocades contre leurs boucliers.
	estocade.

	taille haulte.	a. donne contre D. & C. contre B.
	revers hault.	a donne encore contre D. & C. contre B.

	taille basse.	a donne contre D & C contre B.
	coude retiré.	tous les quatre a. B. C. D. retirent leur couldes en derrier, & s'entredonnent estocades, passent a leurs mains droictes & changent de place.
	estocade.
	a maintenant battra contre B. & D. contre C. pour la deuxiesme cadance, puis repeteront comme auparavant & aprés ces quatre cadances se treuveront disposez comme au commencement.

Passage du Bastion.

Air.	Gestes du cinquiesme passage.
	Supposé que les quatre danceurs sont rengez comme au commencement, D. & B. se mettront le cul l'un contre l'aultre.
	taille haulte.	a. contre D. & C. contre B.
	revers bas.	a. contre B. & C. contre D.
	taille haulte.	a contre D. & C. contre B. & en passant changent de place.

	taille haulte.	a. contre B. & C contre D.
	revers bas.	a. contre D. & C contre B.
	taille haulte.	a. contre B & C. contre D. & en passant changent de place.

	taille haulte.	a. contre D. & C. contre B.
	revers bas.	a. contre B. & C. contre D.
	taille haulte.	a. contre D. & C. contre B. & en passant changent de place.

	taille haulte.	a. contre B. & C. contre D.
	revers bas.	a. contre D. & C. contre B.
	taille haulte.	a contre B & C. contre D. & en passant changent de place.

Aprez l'air de ceste cadance reppeté quatre fois, les quatre danceurs se treuvent disposez comme au commencement: Lors sans intermission, ils font leurs rondes, comme cy devant a esté dit, pour se preparer au sixieme passage.

Passage de la haye.

Air.	Gestes du sixieme passage:

	taille haulte.	a. battra contre D. & C. contre B. & en passant à leurs mains droictes, changeront de place.
	revers bas.	a. battra contre B & C. contre D & en passant changeront de place.

	taille haulte.	a. battra contre D. & C. contre B. & en passant changeront de place.
	revers bas.	a. battra contre B & C contre D. & en passant changeront de place, & se retreuveront comme au commencement.

	taille haulte.	a. battra contre D. & C. contre B. passeront & changeront de place comme dessus.
	revers bas.	a. battra contre B & C. contre D & en passant changeront de place.
	taille haulte.	a. battra contre D. & C. contre B. & en passant changeront de place.
	revers bas.	a. battra contre B. & C. contre D. & en passant changeront de place, & se retreuveront comme au commencement.

Fault maintenant renverser la haye, parquoy a donnera contre B. & C. contre D. pour la deuxieme cadance, puis repeteront comme au paravant ladicte haye & son revers, pour la troisieme & quatrieme cadances, & le tout fait, se retreuveront disposez comme au commencement puis se retireront.

Capriol.

Monsieur Arbeau, je vous mercie de la peine qu'avez prise a m'enseigner la dance.

Arbeau.

Je desirerois avoir peü egaller l'effect a ma bonne affection, que prendrez de bonne part, attendant que je vous recite les airs & mouvements de plusieurs balletz de mascarades faictes en ceste ville, dont nous traicterions en une seconde partie a nostre premier loysir: Ce pendant practiquez les dances honnestement, & vous rendez compagnon des planettes qui dancent naturellement, & de ces Nymphes que M. Varron dit avoir veu en Lydie sortir d'un estang au son des fluttes, dancer, puis rentrer deans leur estang, & quand vous aurez dancé avec vostre maistresse, rentrez dedans le grand estang de vostre estude, pour y proffiter, comme je prie Dieu vous en donner la grace,

L'Orchesographie de Thoinot Arbeau appartient au domaine public et peut être utilisée sans restrictions.